Инфекциска контрола

Стерилизација и дезинфекција

Модерната стоматологија е засновена на тимска работа. Сите членови на тимот според спецификите на својата работа постојано се изложени на болести, од кои многу се и опасни. Денешната стоматолошка доктрина бара сите членови на тимот да спроведуваат хигиенско-превентивни мерки за да ги заштитат пациентите, но и самите себе.

Заштитата се постигнува со општи и специфични мерки. Општите мерки опфаќаат спроведување дезинфекција и стерилизација, како и користење потрошен материјал за еднократна употреба при клинички прегледи или дијагностичко – тераписките постапки.

Специфичните мерки на заштита меѓусебно се дополнуваат и се специфични за поедини сегменти во стоматологијата. Првата и најважна мерка за заштита е миење раце пред и после работа на пациент со вода и сапун, како и носење ракавици за еднократна употреба, што значи се менуваат за секој пациент. После употребата ракавиците се фрлаат во инфективен отпад. Маските и штитниците за лице (визири) се следните нужни елементи во мерките за заштита.

Дезинфекција

Сите работни површини и целото работно место се дезинфицира со средства за дезинфекција, место каде пациентот седи, стоматолошкото столче, рефлекторот, фонтаната, местото каде стојат нашите инструменти, и тоа се прави после секој пациент.

Стерилизација

Стерилизацијата е процес на уништување на сите видови микроорганизми, бактерии и вируси. Денес како стерилизирачки медиум се користи топлината во облик на сув воздух или заситена водена пареа под притисок. Поради некои недостатоци на сувата стерилизација, денес се препорачува стерелизација со автоклавирање – водена пареа или влажна топлина. Главни предности на автоклавирањето се едноставност, брзина, ефикасност и економичност.

Современите автоклави после завршениот циклус на стерилизација, даваат прецизни податоци за успешноста на стерилизацијата и сигнализираат во случај на неуспешен циклус, поради што циклусот се повторува. Заштитата од инфекција кај нашите пациенти за нас е многу важна, поради што се превземаат сите мерки, методи и постапки за таа да биде на највисоко ниво и по најстроги протоколи.